Job 20

Impendulo kaZofari

1 Wasephendula uZofari umNamathi wathi:

2 “Imicabango yami ekhathazekileyo ingifuqa ukuthi ngiphendule ngokuba sengikhubekile kakhulu.

3 Ngizwa kulokukhuzwa okungilulazisayo ukuzwisisa kwami kungifuqela ukuthi ngiphendule.

4 “Ngempela uyakwazi ukuthi kwakuvele kunjani lekadeni, kusukela ukubekwa komuntu emhlabeni,

5 ukuthi ukuthaba komubi kufitshane, intokozo yongakholwayo ngeyomzuzwana nje.

6 Lokuba ukuzigqaja kwakhe kufika emazulwini lokuba ikhanda lakhe lithinta emayezini,

7 uzabhubha okwaphakade, njengobulongwe bakhe; labo abake bambona bazakuthi, ‘Ungaphi kanti?’

8 Njengephupho uyamemetheka angabe esabonwa njalo, axotshwe njengombono webusuku.

9 Ilihlo elake lambona kalisayikumbona njalo; indawo yakhe ingeke ibe isambona.

10 Abantwabakhe bazazincengela ebayangeni babuyisele ngezandla zabo inotho yakhe.

11 Amadlabuzane obutsha alawo emathanjeni akhe azalala kanye laye othulini.

12 “Loba ububi bumnandi emlonyeni wakhe, ebufihla ngaphansi kolimi lwakhe,

13 loba esehluleka ukutshiyana labo abugcine emlonyeni wakhe,

14 kodwa ukudla kwakhe kuzahloba esiswini sakhe; kuzaphenduka kube yibuhlungu benyoka ngaphakathi kwakhe.

15 Uzayihlanza yonke inotho ayiginyayo; uNkulunkulu uzakwenza isisu sakhe sikuhlanze konke.

16 Uzamunya ubuhlungu bezinyoka; amazinyo ebululu azambulala.

17 Akayikuyikholisa imifula, leyomifula egeleza uluju lolaza.

18 Lokho akuginqeleyo umele akubuyise engakudlanga; akayikuyikholisa inzuzo yokuthengiselana kwakhe.

19 Ngokuba ubebacindezela abayanga basala bengelalutho; wathumba izindlu angazakhanga.

20 “Ngempela akayikudeda kulobubuhwaba bakhe; ngeke azisindise ngenotho yakhe.

21 Akusasalanga lutho angabe esaludla; ukuphumelela kwakhe kakuyikuma.

22 Phakathi kwenotho yakhe uzajinge ehlelwe yizinhlupheko; ubuhlungu buzamehlela ngamandla.

23 Nxa esesigcwalisile isisu sakhe, uNkulunkulu uzabhodlisela ulaka lwakhe oluvuthayo kuye akhwele ehle ngezidutshulo phezu kwakhe.

24 Lokuba angaze abalekele isikhali sensimbi umtshoko wethusi uzamciba.

25 Uyawuhwatsha emhlane wakhe, umcijo wawo ocazimulayo awuhwatshe esibindini. Uzangenwa yikwesaba okukhulu;

26 umnyama omkhulu uyilindele inotho yakhe. Umlilo ongungumayo uzamqeda utshise lokho okusaseleyo ethenteni lakhe.

27 Amazulu azabembula ububi bakhe; umhlaba uzamvukela.

28 Isikhukhula sizayithwala indlu yakhe, kungamanzi azimpophoma mhla wosuku lolaka lukaNkulunkulu.

29 Sinjalo isiphetho uNkulunkulu asimisela ababi, ilifa abalikhethelwe nguNkulunkulu.